نصائح لاتقان لغات البرمجة اللي تتعلمها ! | عمرو حسام

نصائح لاتقان لغات البرمجة اللي تتعلمها !


عايز تتعلم لغه جديده ومش عارف تبدأ ؟ شوفت فيديوهات وحاسس بالكسل والملل لانك مطلوب منك ان تفضل تتلقي معلومات وهتفهمها او حتي حاولت تجيب كتب !

لو الطرق اللي فاتت دي مجبتش معاك نتيجه فانا هقولك كام نصيحه بحيث يكون التعليم ممتع وسهل عليك ، لاي شخص حابب يتعلم من الصفر او حتي ان مبرمج وعايز تتعلم حاجه جديده 

هما خمس خطوات هقولك عليهم بالترتيب وكل واحده معتمده علي اللي قبليها 

1: في البدايه حاول تقرأ قوانين اللغه دي او ال ( Syntax) زي ما بيقولوا

مش مهم تحفظ كل القوانين المهم بس انك تكون فاهمها او تميزها بالشكل اللي انت ترتاحله

طبعا من المهم جدا انك تعرف اساسيات وقواعد اي لغه انت بتتعلمها ، لان الحاجات دي بتكون ثابته في كل لغه فا لازم تتعلمها او حتي تقرأ عنها زي التعامل مع الارقام ( integers) او التعامل مع النصوص (strings) التعامل مع المتواليات (arrays) وقواعد الاشتراط زي ( if else) وغيرها من اساسيات البرمجه

اوعي تنسي انك مش لازم تحفظها بس خليها مالوفه ليك ..

2: حاول تدور علي مشروع مفتوح المصدر بالنسبه للغه اللي عاوز تتعلمها :

طبعا هتلاقي كتير من المشاريع مفتوحه المصدر للغه اللي عاوز تتعلمها وممكن تلاقيها علي مواقع زي github وغيرها من المواقع اللي بتستضيف البرمجيات مفتوحه المصدر اختار مشروع مثلا علي الفكره اللي انت عاوز تنفذها او القريب منه

وخلي بالك حاول تخليه مشروع بسيط مش معقد واعتقد احسن حاجه تبدأ بيها هو مشروع لانجاز المهام ( Todo List) المشاريع دي ليها مفاهيم بسيطه وفي نفس الوقت سهله لاي حد يفهمها وحجمها صغير

في النقطه دي انت ممكن متفهمش اي حاجه ، افتح مشروعين في نفس الوقت المشروع المنتهي اللي انت جبته ( المفتوح المصدر ) ومشروع جديد انت هتعمله من الصفر فاضي مفيهوش حاجه

3: ابدأ بكتابه مشروع جديد :

ابدا بكتابه كل كود من المشروع المفتوح المصدر للمشروع الجديد بتاعك زي مقولت اكتب مش Copy & paste قسم مشروعك بنفس المشروع المفتوح المصدر

المهم في المرحله دي ان التطبيق الجديد الخاص بيك يكون شغال بنفس المشروع المفتوح المصدر مش اكتر ولا قليل المهم يكون نفس النتيجه في المشروع المفتوح المصدر واهم حاجه انك تفهم الكود

الطريقه دي هتعرفك علي معظم الدوال اللي موجوده في اللغه دي وازاي تستخدمها بشكل احسن ( best practices)
والطريقه دي هتعرفك تسلسل الكود (work flow ) وازاي تقسم مشروعك (project architecture).

4: المرحله الرابعه حاول تعدل علي الاجزاء اللي مفهمتاش كويس وانت بتكتب البروجيكت او المشروع

في المرحله دي انت لازم تكون مرتاح في اللغه اللي انت بتتعلمها ، وانت بتكتب الكود في حاجات اكيد انت مفهمتاش وكتبتها وخلاص ومدتلهاش اي اهتمام ، حاول ترجع للاكواد دي تاني وتغير فيها وحاول تراقب ال OutPut ( المخرجات) وايه الاجزاء اللي اتاثرت بالتغيير ده .

لو عرفت الاجزاء وفهمتها دلوقتي هيكون عندك فكره علي المشروع وكل جزء فيه وايه اثرها علي المشروع

تقدر برده تستعين بموقع stackoverflow الدراع اليمين لاي مبرمج هتستعين بيه لو عندك خطأ وعايز تبحث عنه

5: دلوقتي حاول تكتب المشروع من البدايه لوحدك ومن غير اي اخطاء

دلوقتي لازم تبدأ بمشروع جديد بينفذ الخطوات بتاعت المشروع اللي فات من غير متستعين بالمشروع المفتوح المصدر تقدر طبعا تستعين بمحرك البحث او stackoverflow

حاول في المره دي تستخدم كود مختلف او تغير من الكود وتتنوع في طريقه حل مشكلاتك

لما تنتهي من المشروع ده هتقدر تنفذ اي فكره في دماغك لانك هتكون عارف الاساسيات ومش هتلاقي نفسك خايف او متردد

كده موضوعنا خلص تقدر تشاركه مع صحابك وتفيد بيه غيرك 

Amr Hossam

ليست هناك تعليقات:

إرسال تعليق