الربح من برمجه تطبيقات الاندرويد عبر جوجل ادموب Google admob | عمرو حسام

الربح من برمجه تطبيقات الاندرويد عبر جوجل ادموب Google admob


لو انت مبرمج اندرويد او مبتدأ فانت اكيد بتفكر في السؤال ده " ازاي هكسب من البرنامج " ؟

وبما ان كتير من الناس معتقده ان الدوانلود بيجيب ربح فا ده تفكير خاطئ جدا بالنسبه لو عايز ترفع برنامجك علي جوجل بلاي يعني

فانا البوست ده ان شاء الله هحاول اشرحلكم الفكره ببساطه تابعوا بق !

اولا لازم نعرف ازاي بيتم الربح من التطبيقات بشكل عام وده عن طريق :

1 : اعلانات في برنامجك انت بتضيفها زي اعلانات ( ادموب - ستارت اب ) مثلا يعني

2 : اعلانات في برنامجك بس زي الفيسبوك كده يعني انك تشوف بوستات متموله من اشخاص تانيه وانت تشوفها وانت بتستخدم الفيسبوك

3: انك تبيع حاجه في برنامجك سواء بق انك بتربط المشتريات بجوجل بلاي او بتعمل دفع بالفيزا او بالبايبال

4: في برامج بتبيع الداتا بتاعت عملائها لشركات تانيه وده اللي انت مش بتشوفه في اتفاقيه الاستخدام وده اسمه ال ( CPA )

5 : في برامج بتدخل برامجها في البورصه او استمثارات

فانا هشرح اللي اعرفه والاكثر شيوعًا يعني واللي هي انت تقدر تضيف اعلانات علي برنامجك من جوجل مثلا الاكثر شهره ( ادموب )

اولا لازم تعرف تلت حاجات ( Google Adsense - Google Admob - Google Adowrds )

اول حاجه هنتكلم عنها وهي جوجل ادوردس وهي باختصار لو انا عندي موقع او برنامج او اي حاجه اقدر اعلن عنها في محرك بحث جوجل وعلي اليوتيوب وفي برامج جوجل زي ال Gmail وال Google Play Store ، وانا حبيت اقولك كده لان ده مربوط ب ادموب وجوجل ادسنس ، انا دلوقتي بعمل اعلان علي جوجل ادوردس ، جوجل بق هتنشره ازاي ؟؟

فا جوجل عملت الاختراع العظيم ده ( جوجل ادسنس ) :

وده عباره عن انت لو عندك موقع وبتكتب محتوي ، تقدر تقدم علي جوجل ادسنس وتنشر اعلانات بتاعت العميل اللي نشرها في جوجل ادوردس ! ( ها فاكرين ؟؟ ) :"D

فبتالي لو انت عندك موقع هتظهر ال ADS اللي الماركتير بينشرها علي ادوردس فا بتتنشر علي موقعك وجوجل بتبق وسيط بينكم انتوا الاتنين ، وبيطلع ليك نسبه 68 % من الارباح وبتقسموا قسمين اللي بيعمل اعلان ( والناشر اللي هو انت )

طيب ايه هو Google Admob ?

زي مقولنا جوجل ادسنس خاصه بالمواقع واليوتيوب ، فا جوجل حبت تعمل منصه لل Android Developers !

وسمتها Google Admob ، طبعا عشان تعمل حساب جوجل ادموب سايبلك اللينك تحت في اخر البوست وهيفتح حساب ادسنس عليه عشان تنزل ارباح ادموب عليه ، لوعندك ادسنس سجل في ادموب علطول ، مش ده المهم دلوقتي المهم ، انت بتضمن الاعلانات دي ازاي في برنامجك وبتتحاسب ازاي ؟؟

اول حاجه انت بتضمن الاعلانات دي في برنامجك عن طريق ال Documentation ده :

https://developers.google.com/admob/android/quick-start

طيب ازاي بتتحاسب ، طبعا انا مش حابب احبطك ولا حاجه بس لازم تفهم كويس اوي ان الارباح مش زي مانت متخيل ، طيب خليني الاول اشرحلك بتتحاسب ازاي .

الاعلان اللي بيظهر في موبايلك ، لو انا مستخدم مثلا وعاجبني الاعلان ده وظاهر في الاعلان تطبيق مثلا انا عايز احمله فا بدوس عليه ودي بنسميها ( كليك ) ، طلاما جه كليك علي الاعلان او نقره دي بتتحسب بفلوس طيب بكام بق ؟؟

دي بتتحسب من دوله لدوله لاعلان لاعلان ( نرجع لجزء جوجل ادوردس تاني ) لو انا بتاع ماركتينج وبعمل اعلان في جوجل ادوردس فانا بحدد سعر الاعلان ده مش عايز اقولك بق بس لاسف المعلنين في الدول العربيه بيحطوا اسعار زفت الزفت والله يعني ممكن الكليك بتوصل لواحد سنت او اتنين او اكتر يعني اللي عايز اوصلهولك انها بتختلف من دوله لدوله من اعلان لاعلان فاهمني ؟؟؟؟

طيب اللي بيشوف الاعلان بيتحاسب ؟

لو تطبيق جاب علي الاعلان الف فيو فانت مش هتتحاسب زي مانت متوقع ممكن توصل لسنت او اتنين سنت بردوا عدد الكليكس او النقرات اللي علي الاعلان هي اللي بتفرق !

طيب نفترض اني بق حطيت الاعلانات في برنامجي الفلوس اللي هتجيلي هتروح فين ؟؟

هتظهرلك في جوجل ادموب ال ( dashboard ) وهيظهرلك كل حاجه عملها اليوزر في الاعلان.

طيب انا مفهمتش بردوا اهميه حساب جوجل ادسنس في الحوار ده ؟؟

زي مقولتلك حساب جوجل ادموب متفرع من ادسنس يعني من الاخر عشان تستلم الارباح لازم حساب ادسنس يعني بالشعبي كده الارباح هتنزلك علي ادسنس عشان تستلمها .

حلو اوي الكلام ده وزالفل اوي :

هستلم الارباح ازاي في ايدي ؟

الارباح بتبق بالدولار بس جوجل نظامها كده ، انك لازم تعدي 100 دولار عشان تستلم دفعه الارباح ، طبعا وانت بتسجل تكتب معلوماتك الحقيقه اسمك ، عنوانك ، وكده ولما تعدي عشره دولار جوجل بتبعت زي جواب علي البريد فيه ست ارقام وبتدخله في حساب ادسنس عشان تفعل ان ده مكانك او مدينتك عشان تقدر تستلم الارباح ( وده اسمه تفعيل الحساب )

طيب فعلنا الحساب واستلمنا البين كود وكلوا بق زالفل 100 % :

بعد ماتفعل الحساب ، هتقدر تحدد انت هتحصل علي ارباحك ازاي ، سواء خدمه ويسترن يونيون ، او تحويل بنكي ، او شيك

بس الاكثر شيوعا هي ويسترن يونيون ولما تعدي ال 100 دولار تقدر تحدد وتبعت عليها ، اول ماتنزل الارباح يوم 21 في كل شهر ، تقدر تستلمهم من ويسترن يونيون ، جوجل بتعملك صفحه كامله فيها معلومات الدفع ومنهم رمز اسمه ال Mtcn وده مهم جدا عشان تستلم ارباحك ، طبعا لازم يبق سنك 21 ، وليك هويه عشان تقدر تستلم ارباحك، لو سنك اصغر من كده تقدر تعمل الحساب باسم والدك، والدتك ، اخوك ، او اي حد كبير يقدر يجي معاك يستلم الفلوس

اكتر من ملحوظه مهمه جدا :

1 : الارباح بتنزل في اول شهر في الرصيد بتاع حسابك واول ماتعدي 100 دولار بتنزل الحواله يوم 21 في الشهر او 22

ممكن اعمل كليك او نقرات علي الاعلان بنفسي ؟؟؟

لو مفكر انك ذكي فا جوجل اذكي منك لاسف ، الناس دي عندها gorithmes تجيبك بلبوص فا بلاش تعمل حويط عليهم الله يخليك وتجنب الشبهات عامتا

للتسجيل في جوجل ادسنس :
https://www.google.com.eg/intl/ar/adsense/start/

للتسجيل في جوجل ادموب : 
https://www.google.ae/admob/

ملحوظه *** : الناس تعمل ادموب الاول ، وهيفتحلك ادسنس ، لان لو عملت من ادسنس هيطلب منك موقع.

لو مرفعتش التطبيق علي جوجل وانت مركب ادموب الاعلانات هتقف في خلال اسبوع مثلا

..اتمني تكون استفدتم ، دمتم بخير

Amr Hossam

ليست هناك تعليقات:

إرسال تعليق